naya-dvyardhaśatikā-ardhaśatikādyaparaparyāyā
adhyardhaśatikā prajñāpāramitā|
om namo bhagavatyai prajñāpāramitāyai namaḥ|
evaṁ mayā śrutam| ekasmin samaye bhagavān * * * * * * * vajrapāṇinā bodhisattvena mahāsattvena, avalokiteśvareṇa ca bodhisattvena mahāsattvena, ākāśagarbheṇa ca, vajramuṣṭinā ca, mañjuśriyā, ca sacittotpādadharmacakrapravarta(rti)nā (?) ca, gaganagañjena ca, sarvamārapramardinā ca bodhisattvena mahāsattvena| evaṁpramukhairaṣṭābhirbodhisattvakoṭibhiḥ * * * ādau kalyāṇaṁ madhye kalyāṇaṁ paryavasāne kalyāṇaṁ sadarthaṁ supadākṣaraṁ paryavadātam, sarvadharmaviśuddhinirhāraṁ deśayati sma-kāmaviśuddhipadametat yaduta bodhisattvapadam| dṛṣṭiviśuddhipadametat yaduta bodhisattvapadam| rativiśuddhipadametat yaduta bodhisattvapadam| tṛṣṇāviśuddhipadametat yaduta bodhisattvapadam| bhūṣaṇaviśuddhipadametat yaduta bodhisattvapadam| āhlādanaviśuddhipadametat yaduta bodhisattvapadam| ālokaviśuddhipadametat yaduta bodhisattvapadam| kāyasukhaviśuddhipadematat yaduta bodhisattvapadam| [vāksukha] viśuddhipadametat yaduta bodhisattvapadam| manoviśuddhipadametat yaduta bodhisattvapadam| śabdaviśuddhipadametat yaduta bodhisattvapadam| gandhaviśuddhipadametat yaduta bodhisattvapadam| rasaviśuddhipadametat yaduta bodhisattvapadam| sparśaviśuddhipadametat yaduta bodhisattvapadam| tatkasya hetoḥ? tadyathā sarvadharmāḥ svabhāvaviśuddhāḥ| sarvadharmāḥ [svabhāvaśūnyāḥ]| svabhāvaśūnyatayā prajñāpāramitāviśuddhirbhavati||
atha bhagavān vairocanastathāgataḥ punarapīdaṁ prajñāpāramitānayaṁ sarvatathāgataśāntadharmatābhisaṁbodhinirhāraṁ deśayati sma-vajrasamatābhisaṁbodhi(dhau?) mahābodhivajradṛḍhatayā| arthasamatābhisaṁbodhau mahābodhirekārthatayā| dharmasamatābhisaṁbodhau mahābodhiḥ svabhāvaśuddhatayā (?)| sarvasamatābhisaṁbodhau mahābodhiḥ sarvāvikalpanatayeti||
atha bhagavān sarvaduṣṭavinayaśākyamunistathāgataḥ punarapi sarvadharmasamatāvijayasaṁgrahaṁ nāma prajñāpāramitānirhāraṁ deśayāmāsa-rāgāprapañcatayā * * *| dveṣāprapañcatayā * * * mohāprapañcatā, mohāprapañcatayā sarvadharmāprapañcatā, sarvadharmāprapañcatayā prajñāpāramitāprapañcatā veditavyā iti||
atha bhagavān svabhāvaśuddhastathāgataḥ punarapīdaṁ sarvadharmasamatāvalokiteśvarajñānamudraṁ nāma prajñāpāramitānayaṁ deśayāmāsa-sarvarāgaviśuddhitā loke dveṣaviśuddhitāyai saṁvartate| sarvamalaviśuddhitā loke dveṣavi[śu]ddhitāyai saṁvartate| sarvamalaviśuddhitā loke sarvapāpaviśuddhitāyai saṁvartate| sarvadharmaviśuddhitā loke sarvasattvaviśuddhitāyai saṁvartate| sarvajñānaviśuddhitā loke prajñāpāramitāviśuddhyai saṁvartate iti||
atha bhagavān sarvatraidhātukādhipatistathāgataḥ punarapi sarvatathāgatābhiṣekasaṁbhavajñānagarbhaṁ nāma prajñāpāramitānayaṁ deśayāmāsa-abhiṣekadānaṁ sarvatraidhātukarājyapratilambhāya saṁvartate| arthadānaṁ sarvāśāparipūraye saṁvartate| dharmadānaṁ sarvadharmatāprāptaye saṁvartate| āmiṣadānaṁ sarvakāyavākcittasukhapratilambhāya saṁvartate iti||
atha bhagavān sarvatathāgatajñānamudrāprāptasarvatathāgatamuṣṭidharastathāgataḥ [śāśvata] (?) punarapi sarvatathāgatajñānamudrādhiṣṭhānavajraṁ nāma prajñāpāramitānayaṁ deśayāmāsa-sarvatathāgatakāyamudrāparigrahaḥ sarvatathāgatatvāya saṁvartate| vāgmudrāparigrahaḥ sarvadharmapratilambhāya saṁvartate| cittamudrāparigrahaḥ sarvasamādhipratilambhāya saṁvartate| vajramudrāpratigrahaḥ sarvakāyavākcittavajrasattvasarvottamasiddhaye saṁvartate iti||
atha bhagavān sarvadharmāprapañcastathāgataḥ punarapi cakrākṣaraparivartaṁ nāma prajñāpāramitānayaṁ deśayāmāsa-śūnyāḥ sarvadharmā niḥsvabhāvayogena, nirnimittāḥ sarvadharmā nirnimittatāmupādāya, apraṇihitāḥ sarvadharmā apraṇidhānayogena, prakṛtiprabhāsvarāḥ prajñāpāramitāpariśuddhyā iti||
atha bhagavān sarvatathāgatacakrāntargatastathāgataḥ punarapi mahācakrapraveśaṁ nāma prajñāpāramitānayaṁ deśayāmāsa-vajrasamatāpraveśaḥ sarvatathāgatacakrapraveśāya saṁvartate| arthasamatāpraveśo mahābodhisattvacakrapraveśāya saṁvartate| dharmasamatāpraveśaḥ sarvadharmacakrapraveśāya saṁvartate| sarvasamatāpraveśaḥ sarvacakrapraveśāya saṁvartate iti||
atha bhagavān sarvapūjāvidhivistarabhājanastathāgataḥ punarapi sarvapūjāgryaṁ nāma prajñāpāramitānayaṁ deśayāmāsa-bodhicittotpādanatā sarvatathāgatapūjāvidhivistaraḥ| sarvasattvadhātuparitrāṇatā sarvatathāgatapūjāvidhivistaraḥ| saddharmaparigrahaḥ sarvatathāgatapūjāvidhivistaraḥ| prajñāpāramitālikhanalekhanadhāraṇavācanoccāraṇabhāvanapūjanakarmaṇa(karma ?) sarvatathāgatapūjāvidhivistaraḥ iti||
atha khalu bhagavān sarvavinayasamarthastathāgataḥ punarapīdaṁ jñānamuṣṭiparigrahaṁ sarva[sa]ttvavinayajñānagarbhaṁ nāma prajñāpāramitānayaṁ deśayāmāsa-sarvasattvasamatāyāṁ krodhasamatā, sarvasattvavinayanatāyāṁ krodhavinayanatā, sarvasattvadharmatāyāṁ krodhadharmatā, sarvasattvavajratāyāṁ krodhavajratā| tatkasya hetoḥ ? sarvasattvavinayo bodhiriti||
atha bhagavān sarvadharmasamatāpratiṣṭhitastathāgataḥ punarapīdaṁ sarvadharmāgryaṁ nāma prajñāpāramitānayaṁ deśayāmāsa-sarvasamatayā prajñāpāramitāsamatā, sarvārthatayā prajñāpāramitārthatā, sarvadharmatayā prajñāpāramitādharmatā, sarvakarmatayā prajñāpāramitākarmatā veditavyā iti||
atha bhagavāṁstathāgato vairocanaḥ punarapi sarvasattvādhiṣṭhānaṁ nāma prajñāpāramitānayaṁ deśayāmāsa-sarvasattvāstathāgatagarbhāḥ samantabhadramahābodhisattvasarvātmatayo (yā ?)| vajragarbhā sarvasattvā vajragarbhābhiṣiktatayā, dharmagarbhāḥ sarvasattvāḥ sarvavākpravartanatayā, karmagarbhāḥ sarvasattvāḥ sarvasattvakaraṇatāprayogatayā iti||
atha bhagavānanantāparyantāniṣṭhastathāgato'nantāparyantāniṣṭhadharmā punarapyasya kalpasya pariniṣṭhādhiṣṭhānārthamidaṁ sarvadharmasamatāparininadhiṣṭhānavajraṁ nāma prajñāpāramitānayaṁ deśayāmāsaprajñāpāramitānantatayā sarvatathāgatānantatā, prajñāpāramitāparyantatayā sarvatathāgatāparyantatā, prajñāpāramitānaikatayā sarvadharmānaikatā, prajñāpāramitāpariniṣṭhatayā sarvadharmāpariniṣṭhatā bhavati||
atha bhagavān vairocanaḥ sarvatathāgataguhyadharmatāprāptasarvadharmāprapañcaḥ punarapi idaṁ mahāsukhavajrāmogha * * * nāma vajrāmoghadharmatāprajñāpāramitāmukhaṁ paramamanādinidhanamadhyaṁ deśayāmāsa- mahārogottamasiddhirmahābodhisattvānāṁ mahāsukhottamasiddhyai saṁvartate| mahāsukhottamasiddhirmahābodhisattvānāṁ sarvatathāgatamahābodhyuttamasiddhyai saṁvartate| sarvatathāgatamahābodhyuttamasiddhirmahābodhisattvānāṁ sarvamahāmārapramardanottamasiddhyai saṁvartate| sarvamahāmārapramardanottamasiddhirmahābodhisattvānāṁ sakalamahātraidhātukaiśvaryottamasiddhyai saṁvartate| sakalamahātraidhātukaiśvaryottamasiddhirmahābodhisattvānāmaśeṣānavaśeṣasarvasattvadhātuparitrāṇasarvasattvahita-
sukhaparamātyantamahāsukhottamasiddhyai saṁvartate iti|| tatkasya hetoḥ ?
yāvadbhavādhiṣṭhāne'tra bhavanti varasūrayaḥ|
tāvatsattvārthamatulaṁ śakyā kartumanirvṛtāḥ||1||
prajñāpāramitopāyajñānādhiṣṭhānasādhitā|
sarvakarmaviśuddhyā tu bhavaśuddhā bhavanti ha||2||
rāgādivinayo loke ābhavātmāsakṛtsadā|
teṣāṁ viśodhanārthaṁ tu vinayaṁ jñātavān svayam||3||
yathā padmaṁ suraktaṁ tu rāgadoṣairna lipyate|
vāsadoṣairbhave nityaṁ na lipyante jagaddhitām (?)||4||
mahārāgaviśuddhāstu mahāsaukhyā mahādhanāḥ|
tridhātvīśvaratāṁ prāptā arthaṁ kurvantu taṁ dṛḍham||5||iti||
adhyardhaśatikā prajñāpāramitā samāptā||